Герб і флаг зарэгістраваны ў Гербавым матрыкуле Рэспублікі Беларусь 20 лютага 2001 г. № 49.

Герб: Іспанскі шчыт рассечаны «ў слуп», у правым чырвоным полі залаты ключ бародкай дагары, у левым блакітным – срэбны ключ бародкай уніз.

Флаг: Прамавугольнае палотнішча з суадносінамі бакоў 1:2, якое складаецца з двух роўнавялікіх гарызантальных палос: у верхняй чырвонай – жоўты ключ бародкай дагары, у ніжняй блакітнай – белы ключ бародкай уніз.

Згодна з легендамі Петрыкаў існуе з Х ст. і атрымаў назву ад імя свайго заснавальніка, яцвяжскага князя, які прыняў пры хрышчэнні імя аднаго з апосталаў – Пятра. Паданні данеслі да нас славянскае імя Петрык. Паводле дакументальных крыніц  Петрыкаў вядомы з XV ст. як мястэчка Слуцкага княства ў складзе Вялікага Княства Літоўскага, якое належала князям Алелькавічам. У XV–XVI стст. па загадзе Юрыя Алелькавіча тут быў пабудаваны замак, разбураны падчас вайны Вялікага Княства Літоўскага з Маскоўскай дзяржавай у 1534–1537 гг. Гэтыя дзве акалічнасці, розначасовыя па храналогіі, але вельмі значныя ў гісторыі развіцця горада, былі пакладзены ў аснову сучаснага гарадскога герба.

Ключ, якім можна адчыняць або замыкаць штосьці – сімвалічны прадмет, які характарызуе таксама «дазваляльную і злучальную сілу» яго ўладальніка. Гэтай сілай у царкоўнай сферы надзелены, паводле Евангелля ад Матфея, апостал Пётр, з імем якога звязваюць назву горада. Абавязковымі атрыбутамі, якія суправаджаюць ўсе выявы гэтага апостала, з’яўляюцца два ключы, срэбны і залаты. Яны, разам з тым, з’яўляюцца сімвалам ўмацаванага горада. Перадача ключа ад абложанага горада ворагам была сімвалам капітуляцыі перад заваёўнікам. З іншага боку, ключы ад горада ўручаюцца ганаровым гасцям, як знак перадачы ўлады, або асаблівага прыязнасці і гасціннасці. У сімволіцы ключы на ​​гербе паказваюць таксама на давер і выпрабаваную вернасць, праяўленую ў адносінах да свайго гаспадара і ўладара.

Герб і флаг г. Петрыкава і Петрыкаўскага раёна і палажэнні аб іх былі адобраны рашэннямі Петрыкаўскага раённага выканаўчага камітэта ад 25 ліпеня 2000 г. № 424 і Сесіі раённага Савета дэпутатаў ад 27 верасня 2000 г. № 39.

Аўтар герба Р.С. Жаўняркевіч, художник А.У. Леўчык.